Krupniok Fest w Bargłówce okiem Tadeusza Puchałki

KRUPNIOK FEST W BARGŁÓWCE.

Ja – kończom se feryje, co nikerym mruczka z tego powodu. Na łokrasa we Bargłówce zorganizowali fest całym pyskym. Doszło do tego wydarzynio, dziynka szwarnym frelkom z Rady Sołecki (pierońsko gryfne gizdy), Caritas, Klubowi Sportowymu „Korona Bargłówka”, fojermanom z miejscowy OSP, pani Sołtys i co ważne karlusowi z pomyślonkym, co mo intus niy łod parady Waltrowi Gnidzie. Jak spominała Sołtys pani Lucyna Tischbierek je to już 7 spotkanie z krupniokami, żymlokami i werflajszym, a zaczono se, spomino pan Walter łod łotwarcio „Małego Skansynu” maszyn rolniczych co powstoł dziynka wydatny pomocy „Spichlerza Śląskiego” a także wielu dobrodziejom okolicznych miejscowości.

1 września choć pukel tasze do szkoły już narychtowane, że to była sobota, to leżały spokojnie we koncie, a młodzi wcielyli se w rola wolontariuszy kierujących gości na odpowiedni plac. Mieli grajfka, szprytnie im to szło. Z paniom Sołtys niy szło pogodać, bo ciyngiym kajś lotała, frelki w piyknych szatkach tak trocha jak Rołt kypsiyn, rozdowały maszkety bajtlom, i tyż godki wiela niy było, (szkoda, fest urodne gizdoki – co jedna to piykniejszo), i jako wszyske Ślonzoczki majom te walory, a gibke, a zwyrtne, ani se niy poszczegniesz już je w inkszym miejscu. – Ja na placu do zabawy przygrywały gwiazdy z radia „SILESIA”. Na sztandach  krolowały KRUPNIOKI, ŻYMLOKI, WERFLAJSZ. Na cołkim placu woniało kawom, ale i dobrego teju se szło napić, moc sztandof boło z piwym wyrychtowanych, a jak kerymu prziszoł smak na maszkety, to frelki zachyncały do sprobowanio swojskigo kołocza. Zabawa twała bezmała do dwanosty w nocy,  bydzie co spomionać. Łorganizatory już dzisio zaproszajom na bezrok. Dycko pojycie krupnikow we Bargłówce we piyrszo sobota miesionca września, toż pamiyntejcie. Na pytanie zadane panu Waltrowi Gnidzie co je dlo niego nejważniejsze, wejrzoł na mie  tak trocha jak byk na masarza, i prawi: Jak to co? Dlo mie ważne je coby se ludzie dobrze bawiyli a co nejważniejsze, coby my niy zapmnieli ło swoich tradycjach –  chopie! Podkryśloł na koniec.

Ja! – To nos Ślonzokow yno trzimo, kamrajstwo i raus ze politykom, ale to już som moje słowa niy naszego łorganizatora, myśla jednak, że mom recht.

Tadeusz Puchałka